Þú ert hér > Forsíða > Fréttir

20.8.2007 12:00:46
Barnabókin Sumar í Sandgerði er komin út
Knattspyrnudeild Reynis og grallararnir taka höndum og loppum saman

Selma og grallararnir

Önnur bókin í bókaflokknum Grallarasögur er komin út.  Sögupersónur eru kisurnar Glingló og Dabbi og hundurinn Rex sem eru rammíslensk og uppátækjasöm og eiga sér lifandi fyrirmyndir í Sandgerði.

Félagarnir eiga heimasíðu sem heitir www.grallarar.is og þar má finna ýmsa skemmtilega leiki, vísnahorn, litabók, uppskriftir og margt fleira.

Selma Hrönn Maríudóttir er hugmyndasmiður verksins um Glingló, Dabba og Rex. Hún samdi texta og vísur í bókunum og sá um hönnun og uppsetningu á vefnum. Hún starfar sem vefhönnuður í fyrirtækinu Tónaflóð sem hún á og rekur ásamt manni sínum Smára V. Sæbjörnssyni.  Saman standa þau að útgáfu bókanna  og halda úti ýmsum vefjum m.a. vefnum 245.is.  Brynhildur Jenný Bjarnadóttir teiknar allar myndir en hún hefur lokið mastersnámi í teiknimyndagerð.

Bækurnar eru ætlaðar börnum á aldrinum 2-6 ára.  Í hverri bók eru sjö stuttar sögur með litríkum myndum.  Sögurnar eru í vísnaformi vel til þess fallnar að auka orðaforða barna, en einnig sagðar á einföldu máli fyrir yngstu lesendurna.

Hugmyndin með bókunum er að kynna ungum lesendum ýmis bæjarfélög á landinu og benda á skemmtilega afþreyingu á hverjum stað sem kostar lítið nema úthaldið. Þannig mun hver bók verða tileinkuð ákveðnu bæjarfélagi og hefst kynningin í Sandgerði þar sem m.a. er farið í fjöru- og eggjaskoðunarferð. 

Hver hefur ekki gaman af að fara í fjöruna og fleyta kerlingar, skrifa í sandinn, fara í eltingaleik við öldurnar og gá hvað leynist undir steinunum. Eða að fara út í móa og skoða egg og unga.  Ferðir sem þessar geta verið ógleymanlegar fyrir alla fjölskylduna og ómetanlegt að sjá lítil andlit ljóma við hverja uppgötvun. 

Það var vel við hæfi að afhenda Sigurði Val bæjarstjóra fyrsta eintakið af nýútkominni bók, en Sandgerðisbær ásamt fleiri góðum aðilum styrkti útgáfu fyrstu bókarinnar.

Selma og Sigurður Valur

Knattspyrnudeild Reynis og grallararnir hafa ákveðið að taka höndum og loppum saman, en deildin undirbýr nú átak í að fjölga ungum iðkendum.  Aðilar á vegum Knattspyrnudeildar Reynis munu ganga í hús í bæjarfélaginu á miðvikudags- og fimmtudagskvöld n.k. (22. og 23. ágúst) og bjóða bókina Sumar í Sandgerði til sölu. 

50% af söluverði hverrar bókar sem þeir selja munu renna til unglingastarfs Knattspyrnudeildar Reynis en bókin kostar 1.000 kr.

Prentvæn útgáfa